Munaasabad aad u balaaran oo lagu xusayay sanadguurada 72-aad ee ka soo wareegtay aas aaskii ciidanka booliska Soomaaliyeed ayaa maanta lagu qabtay dugsiga sare ee boolisska Jeneraal Kaahiye ee magaalada Muqdisho.

Munaasabaddaasi waxaa ka qeybgalay madaxweynaha Jamhuuriyadda Federaalka Soomaaliya mudane Xasan Sheekh Maxamuud oo salaan sharf ka qaatay cutubyo ka tirsan ciidanka Booliiska Soomaaaliyeed, isagoo hambalyo u diray saraakiisha. saraakiil xigeennada, Alifleyda, dableyda iyo xaasaskooda, wuxuuna u rajeeyay horumar iyo baraare.

Ciidanka booliiska Soomaaliyeed ayaa munaasabadda ku soo bandhigay dhoolatis ciidan sida Gaadda ka ciyaar, Gaadiidka ay ku howlgalaan iyo qalab casri ah oo ay u adeegsadaan shaqadooda, sidoo kale kooxda Bambeyda booliiska ayaa halkaasi ka tuntay Musig aad u qiiro badan.

Sidoo kale kooxda fanaaniinta ciidanka booliiska ee Heegan ayaa halkaasi ku soo bandhigay Riwaayad ka tarjumeysay wax qabadka ciidanka, taasoo ay aad u jecleysteen dadkii ka qeybgalau xafladda.

Xafladda oo si heer sare ah loo soo agaasimay ayaa ku soo dhamaatay jawi aad u wanaagsan, iaydoo ciidanka booliiska Soomaaliyeed ay maanta u tahay maalin farxadeed.