Wasiir Maareeye oo maanka ku haaya himilooyin muhiima (Sawirro)
Wasiirka warfaafinta dhaqanka iyo dalxiiska ee dowladda Soomaaliya Maxamed Cabdi Xayir (Maareeye) ayaa soo bandhigay himilooyin badan oo uu rajaynayo in isaga iyo bahda wasaaradda Warfaafintuba ay is kaashi iyo wada jir ku xaqiijiyaan waqtiga dhaw, si loo hormariyo howlaha wasaaradda, xilli ay hadda bilowdeen barnaamijyo qayb ka ah hormariinadaas uu wasiirku hiigsanayo.
Wasiirka
ayaa ballan qaaday in si deg deg ah wasaaradda gudaheeda looga arki doono
isbedel wanaagsan oo ka dhalanaya barnaamijyada hormarineed ee ay fulintoodu
billowga tahay.
Hadalkan
ayuu wasiirku sheegay mar uu kormeerayay howlo lagu dayactirayo qaybo ka mid ah
xafiisyada ay ku shaqayso wasaaradda oo ku yaalla gudaha xarunta wasaaradda.
Wasiirka
oo warbaahinta kula hadlayay gudaha wasaaradda ayaa wuxuu faah faahiyay
himilooyinka ay wasaaraddu leedahay oo isugu jira ballaarinta dhismayaasheeda
iyo waliba hirlgalinta barnaamijyo muhiim u ah shaqaalaha wasaaradda. Isaga oo
arrimahaas ka hadlayana wuxuu yiri " Waxaan rajaynaynaa inaan dhisno
Maktabad qalabaysan oo Internet iyo agab kastaba leh. Waxay Maktabaddu
noqonaysaa goob ay Wariyayaasha iyo dadka soo booqda wasaaraduba wax ku
akhristaan oo aqoon badan ka kororsadaan, sidoo kalena lagu nasto oo Coffee ama
Shaah lagu cabo inta wax akhrintu ay socoto”.
Mudane
Maareeye ayaa mid kale oo himilooyinka ugu waa wayn ee ay wasaaraddu
hiigsanayso sanadka soo socda ah ku sheegay sameynta Hotel u gaar ah
wariyayaasha iyo shaqaalaha wasaaradda, maadaama ay qaarkood waqti 24 saac ah
ka howlgalaan xarunta Wasaaradda una baahan yihiin goobo ay ku hoydaan oo si
hagaagsan loo diyaariyay.
Dayactirka
hadda ka bilowday gudaha wasaaradda warfaafinta ayaa waxaa maal galinaysa
wasaaradda maaliyadda ee dowladda Soomaaliya, waxayna tan qayb ka tahay barnaamijyada
loogu magac daray "Dhiso dalkaaga” oo uu Madaxweyne Xassan ku baaqay.
Wasiirka
warfaafinta ayaa sheegay in muddo 6 bilood ah lagusoo dhammeyn doono howlahan
dib u dhiska ah, isaga oo rajeeyay in muddadaas ka dib ay wasaaraddu yeelan
doonto waji cusub oo ka qurux iyo qaab wanaagsan wajigii burburka ee soo jiray
sanadihii colaadaha.
Geesta
kale, wasiirka warfaafinta dhaqanka iyo dalxiiska dowladda Soomaaliya ayaa
wuxuu caddeeyay in wasaaraddu ay qaddarin iyo ixtiraam wayn u heyso
wariyayaasha Telefishinka iyo Raadiyaha qaranka, kuwaas oo uu ku tilmaamay udub
dhexaadka howlaha wasaaradda. Wuxuuna wasiirku meesha ka saaray warar aan sal
iyo raad lahayn oo dhawaan ay warbaahinta qaar faafiyeen, kuwaas oo lagu
sheegay in wariyayaasha warbaahinta qaranka laga burburiyay guryo iyo qalab ay
lahaayeen oo gudaha wasaaradda yiillay.
Ugu
dambeyntiina, waxaa warbaahinta hadal siiyay agaasimaha guud ee
wasaaradda oo yiri "Waxaa sharaf wayn inoo ah in wasiirka warfaafinta dhaqanka
iyo dalxiisku uu inagu soo booqdo mudane Maareeye xaruntaan cusub laga
hirgalinayo wasaaradda warfaafinta,mashruucani Mudane Wasiir waxaa an ku
fikiraynay mudo labo sano,waxaa uuna ku soo aaday fursad weyn oo ah
in aad adigu nala joogto”ayuu yiri Bahlaawi.
Bahda
ka howlgasha warbaahinta qaranka iyo shaqaalaha wasaaradda warfaafinta ayaa
qaarkood waxay qabaan in wasiirka warfaafinta mudane Maareeye uu yididiilo wax
qabad iyo hormarin ah la yimid xafiiska, isaga oo markii xilkan loo magacaabay
ka dib sameeyay ballan qaadyo hormarineed oo qaarkood hirgalay, halka qaarka
kalena la rajaynayo inay si dhaqsa ah ku suurtagalaan.
Wasaaradda Warfaafinta, Dhaqanka & Dalxiiska, media@moi.gov.so
Wasiir Maareeye oo maanka ku haaya himilooyin muhiima (Sawirro)
.