Wasiirka wasaaradda Cadaaladda Soomaaliya Mudane C/laahi Axmed Jaamac oo dhagax dhigay dugsigan, waxaa wehlinayey oo munaasabada goob joog ahaa taliyaha ciidamada Asluubta Soomaaliyeed General Bashiir Maxamed Jaamac, Xeer ilaaliyaha guud ee Qaran Dr Axmed Cali Daahir, iyo Suldaan Maxamed Siciid oo ah ganacsadaha Soomaaliyeed ee fulinaya howshan.

Ugu horeyn Taliyaha ciidanka Asluubta Soomaaliyeed S/Gaas Bashiir Maxamed Jaamac oo halkaasi kahadlay ayaa sheegay in dugsigan uu noqon doono mid wax lagu baro maxaabiista laguna dhaqan celiyo.

"Dugsigan waxa uu noqonayaa mid ay wax ku bartaan maxaabiista, waxaana lagu kala qiimeyn doonaa heerka ay gaarsiisan tahay aqoontooda”Ayuu yiri Generaal Bashiir Goobe.

Suldaan Maxamed Siciid oo ah ganacsadaha Soomaaliyeed ee maalgalinaya dhismaha dugisga xabsiga dhexe ee Xamar oo isna goobta kahadlay ayaa Taliska Ciidanka Asluubta Soomaaliyeed ku amaanay dadaalkooda oo wax badan kusoo kordhiyey Maxaabiista.

Xeer ilaaliyaha guud ee qaranka Dr Axmed Cali Daahir ayaa talaabo wanaagsan ku tilmaamay in halkii la ciqaabi lahaa oo kaliya wax la baro maxaabiista ku xiran xabsiga dhexe ee Xamar.

"Waa arin wanaagsan runtii in halkii la ciqaabi lahaa maxaabiista wax la baro, taas ayaa ah mid dhaqankooda wax ka badalaya”sidaasi waxaa yiri xeer ilaaliyaha qaranka.

Ugu dambeyn Wasiirka wasaarada Cadaaladda Soomaaliya Mudane C/laahi Axmed Jaamac (Ilka Jiir) ayaa ganacsatada kale ku booriyey in ay muujiyaan doorkooda isagoo u mahad celiyey ganacsadaha maal galinaya howshan iyo Taliska Ciidanka Asluubta Soomaaliyeed.

"Wuu mahadsan yahay Suldaan Maxamed Siciid oo ah ganacsadaha fulinaya howshan iyo waliba taliska oo dadaalay, waa arin muujineysa sida taliska iyo dadka Soomaaliyeedba ay u garab taagan yihiin maxaabiista”Ayuu yiri wasiirka.

—Dhamaad—

—Xafiiska Warfaafinta Taliska Ciidanka Asluubta Soomaaliyeed—

Mahadsanidiin