Maleyshiyo ka tirsan Kooxda Al-Shabaab ayaa Saaka aroortii hore weerar ku qaaday saldhig ciidanka dowlada Soomaaliya ay ku leeyihiin deegaanka Daynuunaay ee duleedka Magaalada Baydhabo ee xarunta Gobalka Baay.

Weerarka naflacariga ee Al-Shabaab ayaa waxaa ka hortagay Ciidanka xoogga Dalka Somaliyeed, kuwaasi oo khasaaro badan gaarsiiyay Shababkii Weerarka ku soo qaaday.

Abaanduulaha qaybta 60-aad ee Ciidanka Xoogga Dalka Gen. Ismaaciil Qaliif Shire ayaa wakaalada Wararka Qaranka Soomaaliya ee SONNA u xaqiijiyay in Ciidanka Qaranka ay fashiliyeen qorshaha ay damacnaayeen Al-shabab.

Abaanduulaha waxaa kaloo uu sheegay in Ciidanka Qaranka ay dileen 20-ka tirsan Shabaab duulaanka soo qaaday.

Saraakiil ka tirsan ciidanka xoogga dalka ayaa sheegay iney Al-Shabaab ka dileen tiro maleyshiyaad ah , isla markaana ay haatan gacanta ku hayaan deegaanka Daynuunay.

Ciidamo gurmad ahaa oo ka baxay Baydhabo ayaa wadada loogu galay agagaarka deegaanka Maya-fuulka ee duleedka Baydhabo, waxaana halkaas lagu dilay illaa shan askari.

Kulamo ammaanka iyo weerarkii saaka Al-Shabaab ku soo qaaday Daynuunay ayaa ka socda magaalada Baydhabo, waxaana kulanka ka qeyb qaadanaya Wasiirada Maamulka Koofur Galbeed iyo saraakiisha ciidamada.