Wasiirka Gaashaandhigga Soomaaliya C/qaadir Sheekh Cali Diini iyo wafdi uu hoggaminayo ayaa maanta u ambabaxay dalka Kenya, halkaasoo uga qayb gali doono shir looga hadlayo Amniga

Wasiirka ayaa waxaa ku sii sagootiyay Garoonka diyaaradaha Aadan Cadde Saraakiil ka tirsan ciidanka xoogga dalka oo uu ka mid yahay Abaanduulaha Ciidamada Jen. C/risaaq Khaliif Cilmi.

Shirka uu Wasiirka uga qeyb galayo magaalada Nairobi ee dalka Kenya ayaa ku saabsan iskaashiga amniga iyo xoojinta taageerada dhinaca ciidamadan, waxaana Wasiirka uu la kulmi doona Saraakiisha dhanka Ammaanka ka taageera Soomaaliya.

Wasiirka Gaashaandhiga ayaa sheegay inuu kulanka uu uga qeyb galayo dalka Kenya uu ku hordhigi doono arrimo badan oo ku saabsan ammaanka dalka, isagoo xusay in loo baahan yahay in la xoojiyo ciidamada, si ay awood ugu yeeshaan sugida amniga.

Wasaaradda Gaashaandhiga ayaa dhowaan sheegtay in lagama maarmaan ay tahay in Ciidamada la qalabeeyo, isla markaana la tayeeyo, si ay ula dagaalamaan Al-Shabaab.

Taliska Ciidanka xoogga dalka ayaa sheegay in meel wanaagsan uu marayo qorshaha dhismaha ciidamada, si sanadka 2017 ay Ciidamada amniga ugala wareegaan AMISOM, waxaana dhowaan tababar loo soo xiray Saraakiil ka tirsan ciidanka.