Wasiirka Gaashaandhigga XFS, Mudane Axmed Macallin Fiqi, ayaa xafiiskiisa ku qaabilay wafdi sare oo ka socda Wasaaradda Gaashaandhigga iyo Ciidamada Talyaaniga, oo uu wehliyo Danjiraha Talyaaniga u fadhiya Soomaaliya, Mudane Pier Mario Daccò Coppi. Wafdiga waxaa hogaaminayay Taliyaha Taliska Hawlgallada Wadajirka ah ee Talyaaniga, S/Guud Giovanni Maria Iannucci.

Kulanka ayaa diiradda lagu saaray xoojinta xiriirka labada dal iyo horumarinta iskaashiga laba-geesoodka ah ee arrimaha amniga iyo difaaca.

Wasiirka ayaa bogaadiyey taageerada Midowga Yurub, gaar ahaan Dowladda Talyaaniga, ee dib-u-dhiska ciidanka, isagoo adkeeyey muhiimadda ay leedahay sii wadidda taageeradaas si loo xoojiyo awoodda Ciidanka Xoogga Dalka Soomaaliyeed ee xaqiijinta amniga iyo xasilloonida dalka.