Taliyaha Ciidanka Dhulka Xoogga Dalka Soomaaliyeed, Sareeye Guuto Sahal Cabdullaahi Cumar, oo uu wehliyo Guddoomiyaha Maxkamadda Darajada Koowaad ee Ciidamada Qalabka Sida, Gaashaanle Sare Xasan Cali Nuur Shuute, ayaa booqday furimaha hore ee dagaalka, gaar ahaan deegaannada Jameeco iyo Leego, oo maalmihii la soo dhaafay uu ka socday Hawlgalka Banooda ee lagu ciribtirayo maleeshiyaadka Khawaarijta ee ku sugan deegaannada Dowlad Goboleedka Koonfur Galbeed.

Taliyaha iyo saraakiisha la socotay ayaa kulamo la yeeshay taliyeyaasha ciidamada ee ku sugan furimaha hore, iyaga oo ka dhageystay warbixinno ku saabsan dagaalladii ugu dambeeyay, guulihii laga gaaray hawlgallada iyo xaaladda guud ee amniga deegaannada ay ciidamada ka wadaan hawlgallada.

Mas’uuliyiinta ayaa bogaadiyey geesinimada, naf-hurnimada iyo dadaalka ay muujinayaan ciidamada Xoogga Dalka Soomaaliyeed ee ku jira dagaalka ka dhanka ah Khawaarijta, xoreynta deegaannada iyo xaqiijinta amniga dalka.

Waxay sidoo kale ciidamada ku dhiirrigeliyeen inay sii laba-jibaaraan dadaallada ay ugu jiraan difaaca dalka iyo badbaadinta shacabka Soomaaliyeed.