Wasiirka waxaa munaasabadda ku weheliyey Agaasimaha Guud ee Difaaca ee Wasaaradda Gaashaandhigga XFS, Mudane Cabdulqaadir Abuukar Maxamed; Madaxa Ergada Soomaaliya ee IMCTC, Sarreeye Guuto Cabdiraxmaan Maxamed Tuuryare; iyo Madaxa Warbaahinta Isbahaysiga, Gaashaanle Fahad Camaar Al-Qaxdaani.

Tababarka waxaa ka qeyb galay wariyeyaal ka kala socday warbaahinta dowladda, warbaahinta gaarka loo leeyahay iyo hal-abuurayaal ka shaqeeya baraha bulshada. Ka qeybgalayaasha waxaa la baray falanqaynta farriimaha xagjirka ah, aqoonsiga wararka marin-habaabinta ah, ka-hortagga hadallada nacaybka iyo diyaarinta farriimo wax-ku-ool ah oo lagu wajahayo borobagaandada kooxaha argagixisada.

Mas’uuliyiinta ka qeyb galay munaasabadda xiritaanka ayaa adkeeyey muhiimadda ay warbaahintu u leedahay dagaalka lagula jiro argagixisada, gaar ahaan ka-hortagga fikirka xagjirka ah, wacyigelinta bulshada iyo xoojinta nabadda iyo wadajirka shacabka Soomaaliyeed.

Hindisaha "Wariyayaasha Nabadda” ayaa qeyb ka ah iskaashiga u dhexeeya Dowladda Federaalka Soomaaliya iyo IMCTC, kaas oo lagu xoojinayo awoodda hay’adaha qaranka iyo doorka warbaahinta Soomaaliyeed ee la-dagaallanka argagixisada, ka-hortagga marin-habaabinta iyo xoojinta amniga bulshada.