"HOWLGALKA BADWEYNTA HINDIYA" Ummadda Soomaliyeed, muddo hadda ku dhow rubac qarni ayey ku soo jirtay burbur, karaamo darro, bahdil, waxayna safka hore ka gashay aadanaha aan magacooda adduunweynuhu wax wanaagsan u nisbeyn.

XOOGGA DALKA, XOOGGA DALKA XAMDIGAA LEH

"HOWLGALKA BADWEYNTA HINDIYA"

Ummadda Soomaliyeed, muddo hadda ku dhow rubac qarni ayey ku soo jirtay
burbur, karaamo darro, bahdil, waxayna safka hore ka gashay aadanaha aan
magacooda adduunweynuhu wax wanaagsan u nisbeyn.

In badan oo akhyaarta qoraalkeygan koobani gaarayo, waxaan rumeysanahay
inay ila qaadanayaan, in sababaha taas Soomaaliya baday ay ku soo arooreyso
qaran dunkii iyo aafooyinkii aan gacmaheenna qiyamkii inaga dhexeeyey ku
wareennay.

Tiirarka qaran uu ku muteysto , sharaf iyo xushmad, qaddarin iyo la
macaamil miisaan leh, waxa ka mid ah, awooddiisa dhaqaale iyo CIIDAN!
Soomaaliya, maanta labadaas qodobba kuma ammaanna, sababaha aan kor ku soo
xusay awgood.

Dadaal, is canaanasho iyo rabitaan ummadeed kaddib, waxa maanta abuurmay
cudud Ciidan Qaran oo curdan ah, leh cilladaheeda, haseyeeshee soo koreysa,
leh dhaliilaheeda, haseyeeshee niyad wanaageedu muuqdo, leh caqabadaheeda,
haseyeeshee rabitaanka ka gudubkeedu sarreeyo.

Ciidamada Xoogga Dalka Soomaaliyeed, waxay safafka hore ee dib u xoreynta
iyo la dagaallanka argagixisada ee hadda ka socda gobollada dalka qaarkood
ay ka muujiyeen, geesinimo, waddaniyad sareysa iyo inay kaga dhabeeyaan
ballantii ay ummaddooda ugu qaadeen, inay difaacooda iyo xaqiijinta
sharaftooda , dalkooda iyo diintooda, naftooda qaaliga ah u hurayaan!

Marar badan ayey qeybaha kala duwan ee bulshada Soomaaliyeed, farriimo
culculus, dhaliilo garowsho leh iyo canaanba u gudbiyeen Ciidamadamadeenna
Qaran. Qeyladhaantaas, bulshadu waxay ku tirtirsiineysay Mas'uuliyiinta
Qaranka iyo Madaxda Ciidamada, inay dulliga ka kor qaadaan, dhaartoodiina
kaga dhabeeyaan.

Haddaba, Howlgalka "BADWEYNTA HINDIYA", waxuu Ciidanka Qarankuku
qorsheytay, inuu baroorta shacabkooda aamusiyo, boogahooda dhayo,
dhiiggoodana u daadiyaan sidii shacabku nolosha iyo xorriyadda uu xaqa u
leeyahay ugu naaloodaan.









Dhanka kalase, waxa isweydiin mudan:

1.    Difaaca dalka iyo jiritaanka qarameed ma waajib ku kooban dowlad iyo
ciidan kali ahbaa?

2.   Haddii ay Ciidmadu safafka hore ee dagaalka ciidameed galeen:

·       Yaa laga rabaa inay galaan, dagaalka, maskaxeed;
·       kan borobogaando;
·      dagaalka dhirrigalineed ee Ciidanka;
·      kan  dibolomaasiyadeed  iyo
·      Dagaalka taakuleyn?

Haddaan agagtideyda u meelo dayo jawaabaha su'aalahan, waxaan qeybaha
bulshadeyda iyo ummaddeyda, cod dheer ugu yeerayaa, in ka wada qeybgalka
dagaalka socdaa yahay waajib wadareed, iilamana muuqato in la joogo xilli
fara isku fiiq-fiiq, isku fiirsasho iyo is gaad-gaad, cabsi iyo hagrasho.

Waxa la taagan yahay waqtigii aan safafkeenna mideyn laheyn, af iyo addinna
isugu geyn laheyn, xaqiijinta dib ula soo noqoshada karaamadeenna iyo
jiritaankeenna qarameed iyo ummadeed. Waxa inala gudboon, inuu qofkastaa
fiidkii markuu sariirtiisa tago isweydiiyo, wixii uu maanta ku soo darsaday
halganka ummadeed iyo xoreynta dalka ee wiilasheenna iyo gabdhaheenna
Ciidamadu geerida, dhaawaca, bacadka, qabowga, roobka gaajada iyo harraadka
ugu bareereen.

Qeybaha bulshada umaddani, waxay kala leeyihiin doorarkooda, qeyb kastana
taariikhda ayey u gali doontaa dhaqanka, ficilka iyo calaamadaha ay maanta
bixiyaan, waxaana qeyb kasta diiwaanka ummadeed u gali doona waxay qortaan.

Waxaan qoraalkeygan oo ah daandaansi qalinleyda Soomaaliyeed (Maxay la
aamusan yihiin) ku soo gabagabeynayaa murtida Soomaaliyeed ee tibaaxeysa:
"BARBARKEY KA BAXDAA, WAA BAKEYLA QALEEN"

Qalinkii Hon. Gen. Bashir Mohamed Jama